المساقى والمعالف فى عنابر الدجاج

المساقى والمعالف فى عنابر الدجاج:


بالنسبه لنظام مياه الشرب فى العنابر هناك نوعان استخدام السقايات البلاستيكيه اليدويه ودى فى منها احجام مختلفه مثلا فى السقايه الى 2 لتر وفى 4 لتر وفى 8 لتر وطبعا احنا بنستخدم السقايات الصفيره للاعمار الصغيره علشان الكتاكيت ما تغرقش فيها وفى نفس الوقت كميه المياه المستهلكه فى العمر الصغير بتكون مش كبيره وبالتالى بيكون الموضوع سهل وبسيط اما السقايات الكبيره فبتستخدم فى العمر الكبير علشان الفراخ ما تقدرش توقعها وفى نفس الوقت بيكون استهلاك المياه بدء يكبر وبالتالىتكون مناسبه من الناحيه العمليه .

ملاحظه هامه : السقايات الصغيره بببتستخدم من اول يوم لحد اسبوع الى 10 ايام بعد كده بنزل السقايات الكبيره
مهم جدا الحذر عند استخدام السقايات اليدويه لعدم سقوط المياه على الفرشه اثناء عمليه السقايه لتجنب الرطوبه الزائده وبالتالى الاصابه بالكوكسيديا وايضا يتم رفع السقايات من على الارضيه باستخدام بلاط او ايشانى او طوب او باستخدام الحوامل الحديديه للسقايات ولازم تكون فى مستوى مناسب حتى تستطيع الطيور الشرب .

ازاى احسب عدد السقايات للعنبر الواحد .

والله انا شوفت اراء مختلفه ناس بتقول سقابه لكل 30 الى 35 طائر وناس بتقول سقايه لكل 50 طائر وفى بعض العنابر تلاقيه عامل سقايه لكل 100 طائر ولو بصينا للعدد 30 هلاقى كده عدد السقايات كبير جدا فى العنبر مع ان ده الصح علشان ندى فرصه لكل الطير تشرب ولان برده سقايه لكل 100 يعتبر شويه فانا مع استخدام سقايه لكل 50 طائر يعنى الالف يحتاجوا 20 سقايه واهم من ده كله نه يتم توزيع السقايات فى العنبر بشكل منتظم ومتساوى وممكن ده اعمله من خلال عدد الباكيات ويكون فى كل باكيه عدد متساوى ويكون بين كل نقطتين علف نقطه مياه .
فى حاله التحصين فى مياه الشرب لابد ان يكون عدد السقايات المستخدمه كافى لضمان ان كل الطيور بتشرب من التحصين وفى نفس الوقت يعنى مثلا بتتحسب كده :
15 سقايه لكل 1000 طائر فى الاسبوع الاول
20سقايه لكل 1000 طائر فى الاسبوع التانى بعد كده وحتى نهايه الدوره
25 سقايه لكل 1000طائر.

بالنسبه للسقايات اليدويه يفضل اللف عليها باستمرار لتفادى انسداد اى منها وممكن يتم غسيلها اسبوعيا باليود فيما عدا اليوم الى قبل التحصين تغسل بمياه فقط بدون اى مطهرات .

السقايات الاوتوماتيكيه :
ودى منها نوعين الايطالى وبيسموها السقايات الجامبو ودى اشهرهم واحسنهم وفى سقايات اسمها الاسرائيلى ودى اقل كفائه من السقايات الجامبو لان الغرقات منها كتير على العموم السقايات دى بتكون داخل العنبر وبتكون متصله بانابيب ومواسير متصله بالتانك المياه الى مفترض يدخل مياه للعنبر وبتتعلق داخل العنبر فى شكل صفوف وبيكون صفين بطول العنبر السقايات دى بيكون لها محبس افقى فيها بيزود ويقلل ضغط المياه يعنى بيزود او بيقلل المياه وليها كمان حبل بتتعلق منه بنتحكم فيها انها تطلع فوق او تنزل تحت علشان تكون مضبوطه فى مستوى الطيور علشان تشرب كويس ولازم يتم اللف على السقايات يوميا لتفادى اى تسريب قد يسبب بلل الفرشه وبردهلان الفيران ممكن تاكل الجلد بتاع الخراطيم فلابد صيانتها باستمرار وعلى فكره دى بيتم فكها خالص عند التطهير لغسيلها وتطهيرها مع كل دوره وبتتحسب سقايه لكل 50 طائر .

خط النيبل او الحلمات :

ودى عبار عن خطوط من الحلمات بيتم بيها الشرب وبتكون متصله بمواسير متوصله بتانك المياه وطبعا بتكون فى صوره صفين او اكتر بطول العنبر وبيتم التحكم بيها انها تطل او تنزل حسب العمر وارتفاع الطيور وممكن تنزلها من عمر يوم حتى تتعود عليها الكتاكيت ولكن يفضل الاعتماد عليها بشكل كامل بعد 10 ايام من العمر وتفضل عن نظام السقايات لانها لا تسبب بلل للفرشه ولا غرقات كتير ولكن تسسب زياده فى عفار العنبر الى ممكن يكون احد اسباب انتشار الماريك والهيربس فيرس .

المعالف :

اطباق التحضين :
ودى بيتم وضعها للكتاكيت من عمر يوم حتى 7 الى 10 ايام وبرده بيتم توزيعها بانتظام داخل العنبر وبتحسب عددها طبق تحضين لكل 50 كتكوت بعد كده بتستبدل بالعلافات الصاج او البلاستيك او خطوط العلف سواء كانت اطباق او خط جنزير .
العلافات اليدويه :
ممكن تكون من الصاج او من البلاستيك وبتتحسب واحده لكل 50 طائر وبتتوزع بالتساوى داخل العنبر وبيتم وضع العلف من فوق والعلافات دى برده بتتعلق داخل لعنبر وبيتم التحكم فيها بالصعود او الهبوط حسب ارتفاع الطيور وعمرهم وبيتم هز العلفات بشكل دورى لتنزيل العلف فيها وتشجيع الطيور على الاكل باستمرار.


العلافات الاوتوماتيكيه :
ودى فى منها نوعين الاطباق او خطوط العلف الجنزير وبتكون متوصله بسايلو العلف خارج العنبر او بحله موجوده فى طرقه العنبر بيتم فيها العلف وبتشغيل الخط اوتوماتيكيا بيتم نشر العلف فى ارجاء العنبر وبتاكل منه الطيور وده طبعا احسن من نظام العلافات اليدويه لتقليل الجهد وتوفير العماله وتقليل تهدير العلف .

مشكور يا دكتور ع المجهود
ويا سلام لو شوية صور توضيحية كنت ظبطتنا عشان انا جاهل شوية في الدواجن استحملني
بس مجهود رائع يستحق كل الاحترام والتقدير

great work

معلومات مهما جدا
بارك الله فيك

merciii doctor

الكبيير كبيرفعلا
تسلم ياحبيبنا ع الموضوع الرائع

Thanks a lot

جزاكم ربى الجنة
وياليت اذا كنت حضرتك دعمتها بصور

جزالك الله عنا كل خير

يسلمو

مشكوررررررررررررررررررررررررررررررررر

مشكوررررررررررررررررررر

دلتا مصر ــــــــــــــ الفتح ــــــــــــــــــــــ الفجر ـــــــــــــــــــ فيدامكس
علما بان هذة المتوفرة لدينا
ولكم جزيل الشكر

شرح جميل شكرا على الايضاح