المساعد الشخصي الرقمي

مشاهدة النسخة كاملة : مفيش اوزان خالص ايه الحكايه سرده ولا ايه


فيلداوي
11-15-2011, 11:58 AM
قطيع فراخ بيضاء من النوع كب والعمر حاليا 25 يوم ومع ذلك الاوزان قليله جدا واقصي فرخ وزنه 700 جم وفيه فراخ 400-500 جم وفراخ اوزانها لا يتجاوز 200 جم وفراخ اخري في نفس القطيع لا تتجاوز 100 جم


ذهبت مع الرجل ولاحظت فعلا قله شديده في الاوزان كما قال وفحصت القطيع وجدت اعراض تنفسيه وطشمه في الفراخ ولاحظت اسهال بني علما بان لا يوجد نفوق ومع ذلك الاوزان قليله جدا كما ذكرت


اعطيت علاج للطشمه وعلاج للكوكسيديا وعلاج للسموم الفطريه وفيتامينات ونصحت بتهويه المكان حيث كان الرجل يكتم العنبر وسوء تهويه


السؤال هل هناك امل في اعطاء اوزان كويسه في هذا القطيع بعد هذا العلاج وما سبب هذا التفاوت الشديد في الاوزان

وهل ممكن تكون فراخ مصدرها كويس ويحصل هذا الحجم في هذا العمر ام انها فراخ سرده علما بأن الرجل يقول انه معمل كويس وموثوق منه

د.محسن كرم
11-16-2011, 04:35 PM
والله يا غالي معروف ان الكب مش بيحول غير بعد ال 25 يوم

التكتيم الشديد بيؤدي الي الاصابه بالكلوستريديا وهي اللي عامله الاسهال البني فلازم تعالجها مع الكوكسيديا

التفاوت في الاوزان ممكن بسبب الاصابه بامراض الصدر والكوكسيديا وايضا عدم التهويه الجيده سبب تفاوت الاوزان

انصحك نصيحه هامه جدا

الفراخ دي لازم تتحقن يابرنس حقنه قوية عباره عن ستربتومايسين + لينكو سبكتين + سيفوتاكس+جنتامايسين

وتتطبق الحقنه بعد 3 ايام

لان الحقنه هاتحول مع الفراخ بنسبة 100 % ان شاء الله

واتفرج ع الفراخ دي بعد ماتتحقن وادعيلي

فيلداوي
11-16-2011, 05:52 PM
شكرا يا دكتور محسن علي مشاركتك ولكن لي كذا ملحوظه

اول ملحوظه انك بتقول ان الكب ما بيحولش الا بعد 25 يوم يبقي المفروض يكون وزنها الطبيعي كام في عمر 25 يوم

والمفروض الطبيعي في الكب يعطي في نهايه الدوره اد ايه من الوزن وفي خلال كم يوم

الفراخ انا كنت اوزنها عمر 20 يوم كانت تعطي متوسط وزن كيلو بس بصراحه مش عارف كانت كب ولا انواع تانيه لكن معظم القطعان اللي كنت اشوفها كانت تعطي متوسط كيلو عند عمر 20 يوم

بالنسبه للحقن انا عطيت وحقنت انرو مع سيفوتاكس واعطيت علاج امبروليوم للكوكسيديا


بالنسبه للحقنه القويه اللي انت ذكرتها فهل ده مش كتير وزياده علي الفرخ شويه يعني جنتاميسين مع سيفوتاكس مع ستربتومايسين مع لينكوسبكتين مع العلم بان الجنتاميسين والستربتوميسين عيله واحده وهي الامينوجليكوسيدات وكمان تأثيرهم الجانبيه كبير علي الكلي وكمان السيفوتاكس له اثار جانبيه علي الكلي وكل الادويه دي تفرز من الكلي

وكمان حكايه التضاد والتفاعلات بين هذه الادويه مع بعضها

فايه رأيك واخر سؤال هو الكلوستريديا فهل ممكن الكلوستريديا تيجي و لا تسبب وفيات واعتقد الاسهال البني غالبا كوكسيديا ولا ايه رأيك

صحراوي صعب
11-17-2011, 08:45 AM
nice

nubantod
11-17-2011, 09:54 AM
اعتقد ان اللون البني للزرق راجع للاصابة بالكلوستريديا ومن الاستفسار هناك سوء تهوية فيجب التهوية الجيدة مع اعطاء المضادات الحيوية المناسبة والافضل حقنا

هانى بدير
11-17-2011, 05:20 PM
والله يا غالي معروف ان الكب مش بيحول غير بعد ال 25 يوم

التكتيم الشديد بيؤدي الي الاصابه بالكلوستريديا وهي اللي عامله الاسهال البني فلازم تعالجها مع الكوكسيديا

التفاوت في الاوزان ممكن بسبب الاصابه بامراض الصدر والكوكسيديا وايضا عدم التهويه الجيده سبب تفاوت الاوزان

انصحك نصيحه هامه جدا

الفراخ دي لازم تتحقن يابرنس حقنه قوية عباره عن ستربتومايسين + لينكو سبكتين + سيفوتاكس+جنتامايسين

وتتطبق الحقنه بعد 3 ايام

لان الحقنه هاتحول مع الفراخ بنسبة 100 % ان شاء الله

واتفرج ع الفراخ دي بعد ماتتحقن وادعيلي



ياراجل اتق الله دا انت دكتور
دى حقنه دى
ولا انت عاوز تبيع دوا وخلااااااااااص

nonoo
11-18-2011, 06:55 AM
اولا الكب يبدا التحويل عمر 27 يوم وهدا عن تجربه طويله ولكن المهم كميه العلف المستهلك وهدا الاهم كميه العلف على الوزن ثانيا-التكتيم مضر والاكيد دى كولسترديا وسيتعها مباشره الكوكسديا لدا انصح بعلاج الاثنين معا ثالثا -طالما لايوجد نافق اعطى تيلوزين+دوكسى شرب 3يوم قبل اى شىء 10ساعه

هانى بدير
11-18-2011, 04:11 PM
ايه ياجماعه حكايه مابيحولش الا بعد يوم كذا او كذا
الكلام ده مش صحيح
الاكل الى بياكله بيحوله
احنا نحكم على الفرخ انه حلو او وحش منين
انه كل كام جرام علف وجاب كام جرام لحم
مش عمر كام بيحول وقبل كدا مش بيحول
انا معاكم ان فى سلالات بتيجى قبل سلالات
فدا بيرجع لاستهلاك العلف
وعلى العموم الكب من اسرع السلالات فى استهلاك العلفِ

kemo82
11-19-2011, 08:11 PM
ممكن اعرف طريق الخلطه بتاعه الحقن دى والجرعات لو تفضلتو ؟؟؟؟؟؟؟

د.محسن كرم
11-20-2011, 01:43 PM
والله يا جماعه الحقنه دي موجوده من يوم ما تربية الفراخ بدأت

وبتجيب نتائج خرافيه و عن تجربه وكل المزارع هنا شغاله كده ومن قبل ما ادخل كلية الطب البيطري وهم شغالين كده
والنتائج سحريه والتحويل خرافي

وبالنسبة للجنتا والاستربتومايسين ف الاستربتومايسين بيشتغل معوي اكتر من شغلع تنفسي والجنتا تنفسي اكتر
واللينكو هنا عشان التحويل
والسيفوتاكس عشان التهابات العين والصدر ايضا

والكوكسيديا اينما وجدت توجد الكلوستريديا ولازم تعالج الاتنين مع بعض
والاسهال البني كلوستريديا وكوكسيديا برده

وبالنسبة لتحويل الفراخ ففعلا فيه فراخ ممكن تفضل لحد العشرين يوم وزنها اقل من نص كيلو
وبعد العشرين الفراخ بتحول جامد
والكب من الانواع اللي تحويلها عالي اوي في الاخر ممكن يوصل معاك بعد العشرين ل 150 جرام في ا ليوم

والحقنه مجربه وخطيره وجرعاتها كالاتي

السيفوتاكس 4 جرام لكل طن لحم يعني تجيب 4 امبولات حجم 1 جرام او 2 امبول حجم 2 جرام للامبول

اللينكوسبكتين جرعته 75 جرام لكل طن لحم

الاستربتومايسين جرعته من 100 الي 130 جرام لكل طن لحم

الجنتامايسين 10 % زجاجه سعه 100 سم تحقن طن


وطريقه تقليب الحقنه انك بتحسب عدد الفراخ وتحقنهم نص سم او 0.6 سم حسب الوزن
وطبعا المياه المستخدمه مياه معدنيه

وبتضع الاستربتومايسين الاول وتقلبة كويس جدا عشان هو تقيل وبيحتاج وقت عشان يدوب
وبعدين تحط الاسيفوتاكس البودره واللينكو والجنتا
وتعيش يا معلم واي خدمه ياعم هااااااني
وطريقه تقليبها انك بتحط الا

فيلداوي
11-20-2011, 03:22 PM
شكرا يا دكتور محسن علي مشاركتك ونقل خبرتك من خلال الفيلد رغم اني ما زلت مقتنع ان ده كتير علي الفرخ وان ممكن السيفوتاكس مع اللينكوسبكتين يقوموا بالدور ده بدون الحاجه لستربتوميسين او جنتاميسين وبدون تكلفه اكثر من اللازم او اجهاد علي الكلي

وبالنسبه للماء اللي يتخفف بيه الحقن انا عن نفسي استخدم ماء عادي من الحنفيه ومفيش اي مشكله ونتائج الحقن بتكون كويسه

هانى بدير
11-20-2011, 06:19 PM
بقولك ايه يامحسن خليك فى الارج
حرام عليك الحقنه دى
وبعدين بلاش مجربه
هيا مش المفروض فيه اختبار حساسيه ولا ايه
انا مؤيد فيلداوى انها حقنه تقيله

د.محسن كرم
11-21-2011, 04:45 AM
بقولك ايه يامحسن خليك فى الارج







شكرا يا فندم علي النصيحه

د/أبوعبدالله
11-21-2011, 05:38 PM
كلامك صحيح يا د/ محسن عن الحقنة المركبة بس حقنة ثقيلة على الفراخ يعني ممكن طول الليل تحس ان الفراخ مكسحة ومش قدرة تقوم ودا تقريبا لوجود مادة الاستربتو مايسين
ودي علطول شغالة في شركة الدقهلية بس الاستربتو ممكن يضعوه في التركيبة وممكن لا ( أنا اشتغلت فيها فترة) وكنا بنستعمل اللينكواسبكتين مع سيفوتاكس مع جنتاميسين وفي مرة استعملنا الاستربتو مكان اللينكو بس الفراخ طول اليوم تتحرك بصعوبة بس الحمد لله شفاء عاجل

د.محسن كرم
11-21-2011, 06:50 PM
فعلا الفراخ بعد الحقنه دي بتقعد كاشه كده يجي ساعتين
لكن اتفرج عليها بقي بعد كده
الاستربتومايسين اقوي حاجه لجميع الاسهالات
بيظبط كل الاسهالات اللي في الفراخ
وذي ماحضرتك قلت فعلا معظم شركات الدواجن شغال بالحقنه دي ( لينكو + سيفوتاكس+ستربتومايسين+جنتامايسين)
وبعض الشركات ممكن تستبدل الاستربتو مكان الجنتا لكن طبعا الاستربتو اقوي بكتيييير


وفيه حقنات تانيه طبعا بنستخدمها ذي حقنه التايلوزين مع الجنتامايسين
ودي بيبقي زجاجه تايلوزين 100 سم تركيز 20 % تحقن 2 طن لحم
و زجاجة جنتامايسين 100 سم تركيز 10 % تحقن طن واحد

وخلي بالك ان التايلوزين ماده زيتيه وبيورم رجل الفراخ
ولكن فيه انواع تايلوزين مائي وليس زيتي فانصحك بحقن التايلوزين المائي ده

وربنا يوفق

the egyptian veterinarian
11-22-2011, 07:39 AM
حبايب قلبى كل من رد على هذا الموضوع واسمحولى اشارك معاكم بعد ما قريت انا فى الاول هارجع للموضوع الاساسى :
السبب فى تفاوت الاوزان فى الفراخ اسيباب كتير وتعالوا مع بعض نحللها ونشوف ايه السبب فى الى حصل
1- تفاوت درجات الحراره بالهبوط والنزول خلال فتره التحضين ممكن يكون السبب وانا مستبعده فى الحاله دى .
2- ان يكون فى سرده فى الكتاكيت ودى بتكون كميه كبيره وغالبا بتكون قريبه من بعضها فى الوزن يعنى ما فيش التفاوت الى انا شايفه فى الفرق فى الاوزان .
3- امراض خطيره ممكن تنخور فى الفراخ واحنا مش عارفين اهمها السموم والبرد والكلوسترديا غير المسببه للنافق وبتكون فى صوره اسهالات بنيه ممكن تلاقيها من عمر اسبوع والفرخ عايش ومتعايش معاها لكن طبعا بتاثر على الاكل وبالتالى التحويل لان مكانها هو الامعاء ودى طبعا مصنع الغذاء .

اعتقد ان السبب الاساسى فى التفاوت ده هو الاصابه بالمرض التنفسى المزمن وبيكون سبب ليه التهويه الغير جيده يعنى لازم نعالج الاتنين نضبط تهويه ونعالج البرد وفى الحالات دى بانصح بالحقن افضل استخدام اللينكوسبكتين لتاثير كمنشط نمو وممكن يساعد فى زياده الاوزان بالاضافه الى دوره فى علاج البرد وبرده ما انساش اعالج الكوكسيديا او الكلوسترديا الموجوده مع البرد .


بالنسبه لاختلاف الاراء على الحقنه المزكوره اعتقد انه علميا ما فيش اى تعارض دوائى بين اللينكو والسيفوتاكس والجنتا والاستربتو يعنى ممكن يتاخدوا والنتايج هاتكون ممتازه لكن اعتقد انها ممكن تكون تقيله وبرده هاتكوت تكلفه خصوصا لو باحقن عدد كبير واوازن تقيله ويمكن الاكتفاء بالاتى
لينكو مع سيفوتاكس
لينكو مع جنتا
لينكو مع ستربتو
لينكو مع سيفوتاكس مع جنت او ستربت يعنى تلاته بس
ناس بتحقن جنتا وسيفوتاكس وستربتو خصوصا فى المزارع ودى الحقنه الثلاثيه المشهوره لعلاج البرد ولان ما فيش اى حاجه منهم لها شغل واضح على المايكوبلازما لكن فى البرد اهم شى اعالج الاى كولى .

يعنى علميا ما فيش تعارض فى الخله دى لو بتتحقن وبتجيب نتايج يبقى تمام بناء عن تجارب حقليه للى ذكر ده بالرغم من ثقلها ماديا وعلى الفرخ لان الدواء زى ما بيشفى ممكن يضر والاهم انى ما استخدمش الجنت خصوصا لو فى مشاكل كلويه .


بالنسبه لموضوع التحويل كلمه التحويل لها اكتر من معنى
التحويل الغذائى يعنى الفرخ اكل كام علف حول كام لحم وكل ما قل ده بيكون ممتاز وده راجع لحاجات كتير منها نوع الفرخ ونوع العلف ومتابعه القطيع من تهويه وحراره وهكذا.

بعض المرببيين بيقولوا ليك الفرخ بدا يحول ودى بنشوفها عمليا فى شكل امتلاء الحصاله بتاع الفرخ بالاكل ودى بتكون غاليا بعد 27 يوم يعنى بيحول تقريبا 100 جم وزن والوقت مختلف بين السلالات

الكب سلاله اكتر ما يميزها انها تاتى باوزان اكتر من غيرها لو هم فى نفس العمر علشان كده الناس بتحبها لكن اى نوع تانى ممكن يجيب نفس الاوزان بس مش شرط بدرى زى الكب .


وشكرا

the egyptian veterinarian
11-22-2011, 07:49 AM
الرجاء الاهتمام بلغه الحوار الجيده بين الزملاء الاعزاء بين قطاع الاطباء واخواتنا المهندسين الزراعيين حتى لو على سبيل الهزار وتقبل الطرف الاخر للكلام ... انا ما ردتش اشيل اى تعليق علشان ما حدش يزعل اهم حاجه احنا بنفيد ونستفيد من بعض دون مغاله او اى زهو من اى حد وشكرا لكل من ادى معلومه جديده ومبتكره واهم حاجه انا باقولها هى خبره الفيلد وشغل الايد وشكرا ليكم كلكم:11_1_211v:

د.محسن كرم
11-22-2011, 08:16 AM
ربنا يقوي ايمانك يا حنين

فيلداوي
11-22-2011, 10:02 AM
شكرا لكل الزملاء الافاضل اللي شاركوا في الحاله دي وشكرا للدكتور مصطفي علي كلامه الجميل ويا ريت ما يتأخرش علينا في الردود وفعلا يا ريت يا جماعه ما نزعلش من بعض واكيد كلنا بنحترم بعض واحنا كلنا بنستفيد من بعض وبنتعلم من بعض وبنقول خبراتنا وبنختلف ونتحاور في الاراء لكن فعلا لازم نحترم بعض في النهايه لان هدفنا كلنا المصلحه العامه والارتقاء بالمهنه واكتساب وتبادل الخبرات والمهارات


بالنسبه لوضع القطيع الان فالقطيع في عمر 35 يوم واعطي اوزان تصل الي 1.5 : 1.650 جم

وطبعا حدث ذلك بعد العلاج وحدث تحسن ملحوظ في الاوزان بعد علاج الكوكسيديا بالامبروليوم وفيتامين ك

وبالنسبه للعراض التنفسيه حدث تحسن ملحوظ بعد التهويه وبعد اعطاء الحقن وهو سيفوتاكس مع لينكوسبكتين لمده يومين

واعطيت دوكسي سيكلين في الماء مع فيتامين اد3ه لمده 12 ساعه وعلاج للسموم الفطريه لمده 12 ساعه



فايه رأيكم في الاوزان دي في عمر 35 يوم بالنسبه للنوع كب

هانى بدير
11-22-2011, 11:57 AM
شكرا يادكتور مصطفى
بس انا مكنتش اقصد اهانه ابدا
ودكتور محسن عارف كدا كويس
بس انا قولتله كدا علشان بيبخل عليا بمعلومات الارج
وياريت حضرتك توضح اكتر يعنى ايه تحويل
ويعنى ايه لو اقل يبقى احسن

د.محسن كرم
11-22-2011, 12:10 PM
شكرا يادكتور مصطفى
بس انا مكنتش اقصد اهانه ابدا
ودكتور محسن عارف كدا كويس
بس انا قولتله كدا علشان بيبخل عليا بمعلومات الارج
وياريت حضرتك توضح اكتر يعنى ايه تحويل
ويعنى ايه لو اقل يبقى احسن





ياراجل انا ببخل عليك .. ربنا يسامحك

والحج مصطفي يقصد ان كل ما الفراخ اكلت اقل وحولت اعلي يبقي احسن
والله اعلي واعلم

هانى بدير
11-22-2011, 12:16 PM
لا يادكتره فى مفهوم تانى انا عاوز اوصله
وانت بتبخل عليا.............

وائل محمد
11-29-2012, 10:14 PM
جزاكم الله خير